Testo Türme vum Dom

En dä graue Flut vum Rhing,
jlitzert hell dä Käätzesching
dä Dom süht hück besonders fesslich us
de Stroße leerjefääch
en jedem Finster brennt e Leech
de miehste Lück sin ald längs zehus.

Weihnachtstimmung en dr Luft Janz Kölle odmet Plätzjeduff
uns Stadt wor selden ens su stell
un dä Weihnachtsmaat
hätt och ald zojemaat
vum Rothus hürt mr hell et Jlockspell

Un die Türme vum Dom han alles em Bleck
Se ston un halden Waach!
Se läje sich nie hin - se schlofe niemols en
Och nit in dr Hillje Naach.

Die die kein Famillisch han
sin beim Weet vun nevvenaan
drinke sich e Bier un kloppe Skat.
En Riehl em Aldersheim es su manche Minsch allein.
hätt dr janzen Daach ömesöns jewaat.

Un die Türme vum Dom han alles em Bleck
Se ston un halden Waach!
Se läje sich nie hin - se schlofe niemols en
Och nit in dr Hillje Naach.

Em Bett em Krankehus
jon dem Jupp de Leechter us
derweil sing Frau ihm noch
die mööde Hängcher hält
Em Kreissaal dicht dobei - hürt mr leis Jeschrei
ne kleine Stropp erbleck dat Leech dr Welt

Un die Türme vum Dom han alles em Bleck
Se ston un halden Waach!
Se läje sich nie hin - se schlofe niemols en
Och nit in dr Hillje Naach.