Testo Owê Wie Jæmerlîche

Owê wie jæmerlîche junge liute tuont, den ê vil hovelîchen ir gemüete stuont ! die kunnen niuwan sorgen: owê wie tuont si sô ? swar ich zer werlte kêre, dâ ist nieman vrô: tanzen, lachen, singen zergât mit sorgen gar: nie kristenman gesach sô jæmerliche schar. nû merkent wie den vrouwen ir gebende stât: die stolzen ritter tragent an dörpellîche wât. uns sint unsenfte brieve her von Rôme komen, uns ist erloubet trûren und vreude gar benomen. daz müet mich inneclîchen (wir lebeten ie vil wol) daz ich nû für mîn lachen weinen kiesen sol. die vogele in der wilde betrüebet unser klage: waz wunders ist ob ich dâ von an vreuden gar verzage ? owê waz spriche ich tumber man durch mînen böesen zorn ? swer dirre wünne volget, hât jene dort verlorn.